బెండకాయ పులుసు, ముక్కల వేపుడు… ఈ రెండే ఎక్కువగా బెండకాయతో చేసేవి. బెండకాయతో మంచి డీప్ ఫ్రై కూడా చేసుకోవచ్చు. వీటినిలో అన్నంలోనే కాదు… సాయంత్రం పూట స్నాక్స్ లా కూడా తినొచ్చు.
కావాల్సిన పదార్థాలు: బెండకాయలు – పది, ఉల్లిపాయలు (సన్నగా తరిగినవి) – అరకప్పు, క్యాప్సికమ్ (సన్నగా తరిగినవి) – అర కప్పు, కారం – ఒక టీస్పూను, గరం మసాలా – అర టీస్పూను, కార్న్ ఫ్లోర్ – అర టీస్పూను, ధనియాల పొడి – పావు స్పూను, బియ్యం పిండి – పావు కప్పు, కొత్తిమీర (సన్నగా తరిగాలి) – పావు స్పూను, నూనె – తగినంత, ఉప్పు- రుచికి సరిపడా
తయారు చేయు విధానం
బెండకాయలను నిలువుగా నాలుగు ముక్కలు చేసుకుని పక్కన పెట్టుకోవాలి. ఒక గిన్నెలో గరం మసాలా, కార్న్ ఫ్లోర్, బియ్యంపిండి, ధనియాల పొడి, కారం, ఉల్లిపాయ ముక్కలు, క్యాప్సికమ్ ముక్కలు, ఉప్పు, కొంచెం నీళ్లు పోసి బాగా కలపాలి. ఆ మిశ్రమంలో బెండకాయ ముక్కల్ని మారినేట్ చేయండి. ఓ పావుగంట సేపు అలా వదిలేయండి. స్టవ్ పై కళాయి పెట్టి డీప్ ఫ్రై చేయడానికి సరిపడా నూనె వేయాలి. నూనె వేడెక్కా బెండకాయ ముక్కల్ని బజ్జీలు వేసినట్టు వేయాలి. అవి గోల్డ్ బ్రౌన్ రంగులోకి వచ్చే వరకు వేగనివ్వాలి. వాటిని స్నాక్స్ లా పిల్లలకి పెట్టొచ్చు.
బెండకాయతో ఆరోగ్యం
బెండకాయ తినడం వల్ల అనేక ప్రయోజనాలున్నాయి. బరువు తగ్గాలనుకునే వారు దీనిని తింటే ప్రయోజనం ఉంటుంది. ఇది శరీరంలోని చెడు కొలెస్ట్రాల్ ను తగ్గిస్తుంది. సో గుండె జబ్బులు వచ్చే ఆపద కూడా తగ్గుతుంది. జీర్ణక్రియను మెరుగుపరచడం, రక్తాన్ని శుధ్దిపరచడం చేస్తాయి బెండలోని ప్రత్యేక గుణాలు. ముఖ్యంగా గర్భిణులకు బెండకాయ చాలా మంచిది. ఇందులో ఫోలిక్ ఆమ్లం పుష్కలంగా ఉంటుంది.
వందగ్రాముల బెండ ముక్కల్లో…
కేలరీలు – 33
కొవ్వు – 0
సోడియం – 7 గ్రాములు
పొటాషియం – 299 గ్రాములు
కార్బోహైడ్రేట్ లు – 7 గ్రాములు
విటమిన్ ఏ – 14 శాతం
విటమిన్ సి – 38 శాతం
కాల్షియం – 8 శాతం
ఐరన్ – 3 శాతం
మెగ్నిషియం – 14 శాతం
విటమిన్ బి6 – 10 శాతం ఉంటాయి.
